週末的開始

星期五媽媽一收工就返嚟帶我去公園，當時未到六點。媽媽五點半先收工，咁快就返到屋企，唔通佢識飛？

喺公園遊咗一陣，我聽到媽媽打電話：「我今晚唔煮飯喇，收工你去．．．等」之後冇幾耐媽媽就推著我沿著〝大生啤〞去食飯；不過大三巴條斜路好〝櫈〞，去到大聲公涼茶附近，媽媽驚我〝櫈〞壞腦，就一手抱我一手推車，勁！

噢！原來又係Toscana，不過中區呢間我第一次嚟。爸爸一見到我喺門口就即刻衝出嚟，見佢鬼咁開心，原來佢唔知我會出現。佢哋食Pizza，我就休息吓，媽媽都好攰喇，俾佢食餐安樂飯喇。佢哋真係為食，食完Pizza仲要去隔離街食雪糕；哈哈，你哋食雪糕，我就整"糕糕"。唉哎！俾佢哋發現咗添，結果媽媽就同我通街換片，好彩佢哋都識得推我埋條巷仔喥換，如果唔係俾路過啲姐姐仔見到就醜死囉。